Leiðir Verkfræðistofa hefur hleypt af stokkunum nýjum kynningarvef fyrir RAVAS vogir. RAVAS framleiðir vogir í flestar gerðir lyftara. Vogirnar eru afar nákvæmar, áreiðanlegar og jafnframt löggildanlegar. Kíkið nánar á vefinn. mobile-weighing.is

Leiðir hefur samið við Iceland Express um sölu á Pidion handtölvum fyrir vörusölu um borð í flugvélum. Leiðir mun þróa söluforrit fyrir handtölvurnar og vera þjónustuaðili að þróun lokinni.

Leiðir hefur þróað og smíðað iButton skráningarstöðvar fyrir Nema í Færeyjum. Hver skráningarstöð inniheldur tvo iButton lesara og hefur samskipti við miðlægan vefþjón. Skráningarstöðvarnar munu vera notaðar fyrir tímaskráningu starfsmanna hjá ýmsum fyrirtækjum í Færeyjum. Upplýsingar um skráningarstöðvarnar er að finna hér.

Leiðir verkfræðistofa hefur flutt sig um set. Plássleysið var farið að segja til sín og því var tekin ákvörðun um að leita að nýju og hentugu húsnæði.
Leiðir hafa því flutt að Grensásvegi 3, 108 Reykjavík.

Undanfarin ár höfum við deilt húsnæði með SAGAsystem sem við höfum átt náið og gott samstarf með. Við höldum áfram á þeim grunni og deilum enn húsnæði með þeim. Bráðlega munu einnig bætast við tvö önnur fyrirtæki í rýmið á Grensásvegi 3. Það eru Zeus web works ehf og Ferðaþing ehf en Ferðaþing er í sameiginlegri eigu Leiða Verkfræðistofu ehf og Zeus web works ehf.

Það má því segja að brátt verði sannkallað fyrirtækjasetur að Grensásvegi 3.

Leiðir ehf hefur verið skráð sem verkfræðistofa.  Meginverkefni fyrirtækisins eru að hanna og þróa lausnir fyrir viðskiptavini fyrirtækisins.  Sjálfvirk skráning upplýsinga er meginviðfangsefni stofunnar.  Ráðgjafahlutverk og hönnun ásamt hugbúnaðargerð eru því meginkjarni þeirrar þjónustu sem Verkfræðistofan Leiðir býður viðskiptavinum sínum.  Nú sem áður mun stofan bjóða hagkvæmar lausnir sem leiða til aukins öryggis í meðferð upplýsinga auk hagræðingar og sparnaðar í vinnulagi viðskiptavina sinna.

Sem hluti af þessu ferli hefur félagið fengið nýtt nafn og heitir nú Leiðir Verkfræðistofa ehf.

Mikið hefur verið að gera hjá samstarfsfélagi okkar, Ferðaþingi. Ferðaþing rekur bókunarkerfið Markaðstorg Ferðaþings sem er einskonar markaðstorg fyrir alla ferðaþjónustu á Íslandi. Viðskiptavinir eru nú orðnir 14 talsins og velta kerfisins á mánuði komin í 107 milljónir króna.

Ferðaþing ehf var stofnað í mars 2009 og hefur vöxtur fyrirtækisins verið stöðugur síðan. meðal viðskiptavina má nefna Iceland Travel Assistance, Íslenskir fjallaleiðsögumenn, Kerlingarfjöll, Jökulsárlón og Hótel Höfn. Margir hafa fengið nýjar heimasíður með bókunarvél og mikið er um kross sölu þarsem söluaðili selur þjónustu þriðja aðila úr kerfinu, en þar er einmitt sérstaða markaðstorgsins að einn söluaðili getur boðið uppá þjónustu margra þjónustuaðila með lítilli fyrirhöfn.

Ferðaþing ehf er að hluta til í eigu Leiða ehf.

Nú er kominn í loftið nýr og enn betri vefur Leiða ehf.

Fyrri vefsíða fyrirtækisins leit dagsins ljós árið 2004 og síðan þá hefur mikið vatn runnið til sjávar. Fyrirtækið hefur vaxið og dafnað og blómstrar nú sem aldrei fyrr og hafa umsvif þess aldrei verið meiri en nú í ársbyrjun 2010.

Í ljósi þess hve tækninni hefur fleygt fram undanfarin ár og mikilvægi vefsins aukist í starfi fyrirtækisins, var ljóst að breytinga var þörf. Því er það okkur sönn ánægja að hleypa af stokkunum nýrri og glæsilegri vefsíðu. Er það von okkar, að nýi vefurinn nýtist enn betur en sá gamli og þjóni þörfum okkar viðskiptavina eins og best verður á kosið.

Bergþór Þormóðsson

Nýr framkvæmdastjóri, Bergþór Þormóðsson, hefur verið ráðinn til fyrirtækisins. Bergþór er Tæknifræðingur frá háskóla í Árósum Danmörku. Bergþór er giftur Guðrúnu Stefánsdóttur og á með henni tvær uppkomnar dætur. Bergþór starfaði hjá Ístaki verktakafyrirtæki og þar áður hjá Orkuveitu Reykjavíkur.

Ráðning Bergþórs er tilkomin vegna aukinna verkefna fyrirtækisins.  Verkefni Leiða ehf eru þess eðlis að töluverð samskipti þarf að hafa við viðskiptavini, vegna þróunar og aðlögunar á þeim tæknibúnaði sem unnið er að.  Magnús Þór, eigandi og fyrrverandi framkvæmdastjóri mun færa sig alfarið í vöruþróun og hugbúnaðargerð.

Við bjóðum Bergþór velkominn til starfa.

Leiðir ehf hefur lokið endurgerð afgreiðslukerfis Sorpu. Í stað strikamerkjakorta not viðskiptavinir nú örmerkjakort til að skrá komu sína á svæðið. Bílar sem aka um samtals 4 vogir vigtast sjálfvirkt á inn- og útleið og eru skráningarnar meðhöndlaðar í Axapta hugbúnaði sem prentar reikninga og sinnir innheimtu. Myndavélar vista myndir af vigtunum og starfsmenn nota kallkerfi til að aðstoða við afgreiðsluna. Verkið hefur tekið rúmt ár í vinnslu en skipt var um allan vélbúnað og bætt við skráningarstöðvum. Verkið var unnið í samstarfi við HugAx hugbúnaðarhús. Endurnýjun afgreiðslu- og skráningakerfis Sorpu er án efa stærsta verk Leiða frá upphafi en þess má geta að Leiðir hefur verið þjónustuaðili Sorpu um árabil. Leiðir ehf óskar Sorpu til hamingju með glæsilegt kerfi. Umfjöllun um Sorpukerfið má sjá hér.

Nýr starfsmaður, Stefán Birnir Sverrisson, hefur hafið störf hjá Leiðum ehf. Stefán er rafmagnsverkfræðingur að mennt frá Álaborgarháskóla. Stefán er giftur Ingibjörgu Ástu Rúnarsdóttur tölvunarfræðingi og á hann með henni einn strák og er annað barn er á leiðinni. Ráðning Stefáns kemur til vegna stóraukinna verkefna hjá Leiðum ehf og á eftir að auka afkastagetu okkar til muna.